الرئيسية / منوعات / التسوق و الشراء من الانترنت خطوة بـ خطوة

التسوق و الشراء من الانترنت خطوة بـ خطوة

السلام عليكم ورحمة الله وبركاته ، معكم أخوكم عبدالله التويتان هذه أول تدوينة لي في مدونة كويت بنق وهذه بداية لسلسة من التدوينات القادمة بإذن الله ، في هذه التدوينة راح اطرح موضوع مهم جدا وهو الطلب والشراء عبر الانترنت ، مع انتشار الهواتف الذكية ومثل ما نعرف غلاء الاسعار لبعض المنتجات وبعض المنتجات غير متوفرة في السوق المحلي فلذلك الحل هو الشراء عبر الانترنت بدون اي خوف وبسهولة وخلال أيام تكون السلعة عند بابك ! راح اشرح الطلب خطوة بـ خطوة بإذن الله.

خل نبدي من الصفر ، شتسوي بالبداية ؟ أول شي تروح البنك اللي تتعامل معاه وتفتح لك بطاقة فيزا Visa سواء كانت الفيزا اللي تكون مربوطة بحسابك أو تعبيها Prepaid والأفضل تاخذ اللي تعبيها عشان ما يكون كل مبلغك معرض لأي شي ، بعد فتح الفيزا تحتاج إلى عنوان بريد في البلد اللي راح تطلب منه السلعة وغالبا الطلب يكون من أمريكا فتحتاج إلى صندوق بريد عشان تشحن عليه البضائع ، لان العملية كالآتي تطلب السلعة والبائع يقوم بإرسال السلعة إلى بريدك في أمريكا ومن ثم إلى الكويت ، لأن البائع لا يستطيع أن يرسل السلعة للكويت مباشرة (في الغالب) فتحتاج لفتح صندوق بريد في أمريكا ، كيف تفتح الصندوق ؟ في عدة شركات وعشان ما اشتتك راح ارشح لك ثلاث شركات ، عندك شركة أرامكس aramex (تقدر تفتح صندوق من الموقع هنا أو بالذهاب إلى مكتبهم في الكويت) ، الشركة الثانية MyUS (تقدر تفتح الصندوق بالذهاب للموقع هنا فقط) ، الشركة الثالثة وهي WorldShip1 (تقدر تفتح صندوق بالذهاب للموقع هنا فقط) ، طريقة التسجيل وفتح الصندوق سيأتي بإذن الله.

أول الشركات اللي تعاملت معاها أول ما بديت الطلب عبر الانترنت كانت هي أرامكس ، لأني كنت اخاف في البداية من الطلب عبر الانترنت (كما الغالب كان مثلي) لكن حاليا غير طبعا 🙂 فكنت أدور على شركة تفتح لي الصندوق وكل شي ويكون عندها مكتب في الكويت عشان لو أي شي اروح لهم بس مجرد أدفع لهم كاش مبلغ 12 دينار لفتح الصندوق وكل شي عليهم ، فرحت لمكتبهم في الكويت وفتحوا لي الحساب وهو عبارة عن ثلاث صناديق في ثلاث بلدان (يعني كل بلد فيه صندوق وهم أمريكا وبريطانيا والصين) ، وعطوني العناوين الثلاثة لصناديق البريد لحسابي في ورقة وعطوني الموقع عشان اتابع الشحنات وهو Shopandship ، فاللي يبي يروح لمكتبهم ويفتحوله الحساب كيفه ، وفيه الطريقة الثانية وهي عن طريق النت تفتح الصندوق وانت بالبيت قاعد ، كالآتي ادخل على موقع shopandship.com لأنه بينه شراكة مع أرامكس

تضعط على التسجيل راح تطلع لك الصفحة التالية تعبي فيها جميع بياناتك عشان لما توصل الشحنة للصندوق في أمريكا أو بريطانيا أو الصين تعرف الشركة لي وين توصلها ؟ سواء لي توصلها عند البيت أو توصلها لمكتب الشركة وانت تستلمها

 

بالنسبة للرمز البريدي للمنطقة من قوقل تقدر تدوره ، بالنسبة للكويت هنا ، بعد ما تسجل البيانات خلاص راح تظهر لك صفحة فيها شكر لك على التسجيل ولتفعيل حسابك روح للإيميل واضغط على الرابط ، تروح تدخل على ايميلك وراح تلقى دازين ايميل فيه رابط تضغط عليه وبعدين راح يطلب منك ايميلك والرقم السري عشان تدخل للحساب تحطهم وراح تدفع بعدها رسوم الاشتراك وهي 45 دولار مرة واحدة مدى الحياة تحط رقم الفيزا وباقي المعلومات ، واترك الخانة فارغة في Promotion code ، بعدها خلاص راح تطلع لك صفحة ترسل فيها رسالة لتفعيل الحساب ، تختار في الـ Subcategory خيار (Active Mailbox) وفي الـ  Subject تكتب (active account) وفي الـ Description تكتب (active account) وتحط Submit خلاص تتنتظر عملية التفعيل لين يدزون لك على الايميل ، بعد التفعيل تدخل على موقع shopandship.com وتسجل الدخول بالايميل وكلمة السر وراح تشوف عناوينك في البلدان الثلاثة في كل بلد صندوق كالآتي

وراح تعرف بإذن الله شلون تستخدم عنوان البريد هذا في الطلب من المواقع ووين تحطه ، وطبعا نفس الخطوات تقدر تطبقها مع المواقع الثانية إذا تبي تشترك مع غير أرامكس مثل MyUS (تدخل موقعهم MyUS.com) أو WorldShip1 (تدخل موقعهم WorldShip1.com)

 

من أفضل الشركات للشحن هي MyUS ، وفيها ميزة تجميع الشحنات يعني تقدر تطلب مجموعة من الطلبات وتشحنهم متى ما تبي وبصندوق واحد (يعني تكلفة أقل للشحن وتوفر فلوس أكثر) ، ولكن عندهم ثلاث أنواع من الحسابات مو مثل أرامكس حساب واحد ، حساب مجاني وفيه مميزات محدودة ، وحساب بريميم وفيه ميزة تجميع الشحنات ، والحساب الثالث مالنا شغل فيه ، أنا افضل أنك تسجل في الحساب البريميم ، التسجيل كالآتي ، تدخل موقع MyUS.com

تضغط على Join Now عشان تسجل

الحسابات ثلاث مثل ما قلت ، الحساب العادي (مميزاته محدودة وما فيه ميزة تجميع الشحنات) ، وحساب بريميم Premium (فيه مميزات وايد ومن ضمنها تجميع الشحنات) وهو 7$ شهريا او 60$ سنويا انت تختار تبي بالشهر تدفع أو بالسنة ، وانا انصح بالبريميم ، الحساب الثالث مالك شغل فيه ، المهم تختار نوع الحساب اللي تبيه وتضغط على Next

بالنسبة للرمز البريدي للمنطقة من قوقل تقدر تدوره ، بالنسبة للكويت هنا

الدفع ومعلوماته مثل ما اهو واضح في الصورة اللي بالأعلى ، بعد الدفع راح يحطلك التأكيد تكمل خلاص وراح يرسلون لك العنوان على الايميل وتقدر تدش بحسابك في الموقع   

هناك كثير من المواقع للطلب عبر الانترنت ولكن هناك مواقع شهير جدا والغالب يطلب منها لأنها أمان أولا وثانيا تجد أغلب ما تريده فيها ، فمن أشهر المواقع للطلب عبر الانترنت :

– موقع أمازون Amazon (فيه كل شي تقريبا)

– موقع ايباي Ebay (أشخاص يبيعون في الموقع وبعض الشركات ،  فيه كل شي تقريبا)

– موقع آبل Apple (آيفون ، آيباد ، ماك وغيره)

– موقع كلوف البريطاني clove (موقع مشهور في الهواتف الذكية الجديدة)

– موقع اكسبريس Express (الشهير بالملابس)

راح اشرح بإذن الله الطلب عن طريق الموقع العالمي الشهير أمازون amazon.com ، الموقع فيه كل شي تقريبا ، هواتف وكمبيوترات وأجهزة وملابس وعطورات وساعات وغيره ، أول شي لازم تسوي لك حساب مستخدم في الموقع عشان تطلب منه وتتابع شحنتك ، خطوات التسجيل في الموقع سهلة كالآتي ، بعد ما تدخل على موقع amazon.com ، راح تشوف على اليمين كالآتي اضغط على هذا الخيار

بعدها راح تطلع لك صفحة تحط فيها بياناتك وكلمة السر كاللآتي

وخلاص صار عندك حساب في أمازون ، الحين خل نحط عنوان صندوق بريدك الأمريكي اللي فتحته سواء من أرامكس أو MyUS أوغيره عشان يكون بشكل افتراضي في حسابك وعلى طول تشحن عليه ، تروح لـ Your account

تختار بعدها خيار Add new address من قسم الـ Settings

تحط عنوانك مثل ما انا شارح كمثال عنواني شلون تحطه ، اسم الشارع في Address Line1 (يكون دايما اسم الشارع طويل) ، رقم الجناح أو الشقة اللي موجود فيها صندوقك (يكون رقم وأصغر من رقم الشارع) والباقي كالصورة

خلاص الحين ربطنا صندوق بريدك بحسابك في موقع أمازون ، الحين نروح نجرب نشتري شي مثلا كاميرة

تضغط على Add to Cart (ضعها في العربة)

بعدين إذا خلصت ضفت كل ما تريد أن تشتريه إلى العربة اضعط على Proceed to checkout

اختار Ship to this address لأننا وضعنا العنوان مسبقا وربطناه

هذه خيارات سرعة شحن سلعتك ، تختار السرعة اللي تبيها خلال يوم او يومين وو .. (طبعا كل ما كان أسرع كل ما زاد السعر للشحن)

بقي الآن الدفع ، تحط معلومات بطاقتك الفيزا اللي طلعتها من البنك اللي تتعامل معاه ، في الخانة الأولى على اليسار تحط رقم البطاقة ، والخانة اللي بعدها اسم صاحب البطاقة ، واخر شي تحط تاريخ انتهاء البطاقة ، وتضغط على Add your card

آخر شي تأكد من معلوماتك ، عنوان صندوق بريدك صحيح وبعدها اضغط على Place your order ، ومبروك عليك الطلب

هذه أساسيات الطلب عبر الانترنت ، نفس الشي تقدر تسويه مع المواقع الثانية مثل eBay وموقع آبل وهكذا ، طبعا كل واحد كان عنده خوف وتردد في أول مرة يجرب الطلب عبر الانترنت لكن بعد المرة الأولى خلاص راح يكون سهالات وراح يحس شلون كان قبل مضيع فلوسه ووقته انه ينطر الجديد او ما يحصل اللي يبيه في السوق أو يشتريه من السوق المحلي بضعف السعر ! ، هذه كانت تدوينة عن طريقة الشراء من الانترنت خطوة بـ خطوة.

شاهد أيضاً

فيديو : كلب يفوز بجائزة ابشع كلب بالعالم .. ولديه ٣٠ الف متابع على انستغرام

  الكلب القبيح .. يفوز بلغب اقبح كلب بالعالم … ولديه ٣٠ الف متابع على …

105 تعليقات

  1. السلام عليكم ورحمة الله وبركاته

    موضوع مميز اخ عبدالله ، ان شاء الله يفيد الكثير الي متخوف من الشراء من النت

    بارك الله فيك تابع المواضيع الطيبة

  2. يعطيك العافيه شرح دقيق بكل شي ماخليت شي ماشرحته ماشاءالله وناطرين تدويناتك انشاءالله

  3. ياسلاااام من زمان أدور أحد يشرحلي هالطريقة

  4. فهد الزمانان

    برافوا والله يا عبدالله اختيارك موفق للكتابه في مدونة كويت بنق صوتك راح يوصل لشريحه اكبر وانا متابع اداءك من زمان

    والشكر ايضا للأخ محمد لتوفير مساحه للمبدعين امثالك

    استمر وناطرين التدوينه القادمة لك

  5. أبدعت يا عبدالله في هالموضوع .. شرح شامل وبكل تأكيد راح يستفيد منها شريحه كبيره كانوا يجهلون بعض الامور البسيطه الي انتا وضحتها

    ورسالتي للقراء .. الشراء من الانترنت موضوع سهل جداً ولكن خطوته الاولى فيها رهبه .. ولكن بعد شرح شامل كـهذا الامور سهالات بأذن الله ..

  6. شكرا لك اخ عبدالله على الشرح

    وان شاء الله الكل يستفيد

    تعليق بسيط اخي عبدالله

    الان الناس اتجهت ل myus & worldship1 لسهوله تجميع الشحنات

  7. يعطيك العافيه
    يعني ما يحتاج ال paypal ?

    • الله يعافيك ، ال PayPal تحتاجه في موقع Ebay لانك لا تستطيع الشراء من موقع ebay إلا اذا كان عندك حساب في paypal ، اما امازون وابل فتستخدم فيزتك بشكل مباشر

  8. يعطيك العافيه
    يعني ما يحتاج ال paypal?

  9. تمت إضافة هذا الموضوع للمفضلة , شكرا لك على هذا الشرح الوافي والواضح

    شكرا مرة أخرى

  10. العدواني

    والله افضل تدوينة في المدونة بحثت في كل المواقع مالقيت مثل هالشرح و طلعت السالفه بسيطة

    ع راااااسي والله

  11. ąℬǫ ⅇℓ7ℓῳⅇⅇℕ

    الله يبيض وجهك

    شرح وافي وتنسيق اجمل مايكون جذبني الموضوع ومن خلال ماقريته فهمت كل شي عساك ع القوه وعسا ربي لايحرمك الاجر

  12. بويعقوب

    يعطيك العافية اخوي عبدالله صراحة كفيت ووفيت : )

  13. والله انه احلا موضوع قريتة في حياتي …… انا من الناس الي اخاف اتعامل مع الانترنت بس موضوعك غير وجهة نظري ……….. انا دخلت علي الابل ستور ونصدمت من سعر الايفون ٥ …… بخمسين دينار …… والي هني ب٢٤٠ فوق

    • تسلم يا سعود ، بس للتنبيه الايفون 5 اللي شفته في موقع آبل بخمسين دينار هذا مع عقد مدة سنتين يعني تدفع خمسين دينار وبعدين شهريا تدفع تقريبا 50 دولار اشتراك لمدة سنتبن مع شركة من شركات الاتصال في امريكا ، تقدر تطلبه بدون اشتراك ولا شي بسعر 649 دولار

  14. خالد العنزي

    يعطيك العافيةعلى الشرح المميز

    سؤال : محتاج توضيح حول كيفية وصول السلعة الى الكويت لأن البضاعة ارسلت على البريد الامريكي يعني البضاعة مازالت في امريكا كيف استلمها في الكويت ؟

    • الله يعافيك ، الطريقة كالآتي بعد ما ارسلت شركة امازون او ابل او الشركة اللي شريت منها الشي راح ترسله للصندوق في امريكا ، لما توصل السلعة للصندوق ، الشركة اللي فتحت منها الصندوق (ارامكس او MyUS او او ) راح تشحن البضاعة للكويت عبر مندوب عندهم ويوصلونها للعنوان اللي حطيته في موقع شركة الشحن لما فتحت الصندوق ، اتمنى وضحت الفكرة 🙂

  15. يعطيك العافيه على هالشرح الوافي للموضوع
    وبالفعل اغلب الناس عبالهم العملية صعبه ومعقده
    وهي بالصج ماكو اسهل منها
    وانا بالنسبة لي اعتبرها ادمان مو زين احد يتعود
    عليها :p
    عساك ع القوة

  16. السلام عليكم أستاذ عبدالله, لك ساعة تمسح إسمك من الصور ونسيت وحدة منهم 🙂

    عالعموم, هل ما زلت تنصح بأرامكس؟ ووش الحل مع تجميع البضاعة؟

  17. ما شاء الله ، شرح كامل ،
    جزاك الله خير اخوي عبدالله .

    بس بخصوص شركات الشحن و بذات ارامكس
    بالفتره الاخيره ، زادت اسعار الوزن و صارت نار !

    فـ شنو البديل لها ؟ او الافضل منها ؟

    وياليت تحط لنا مميزات WorldShip1 او MyUS
    و شرح لطريقة التسجيل ، لو ما عليك كلافه 🙂

    و معلوماتي صفر ب MyUS
    و WorldShip1 خايفه من سالفة الوزن !!

  18. عبدالرحمن

    كلمة وحدة :
    بيض الله وجهك .

  19. عبدالرحمن

    بيض الله وجهك .

  20. يعطيك العافيه على الشرح المميز جدااا
    بالنسبه للبطاقه عقب ما حطيت الرقم والاسم وتاريخ الانتهاء
    طلعلي احط عنوان
    ماني عارف اي عنوان احط
    هل احط عنوان الشحن او عنوان البطاقه؟

  21. بس بعدين كيف يوصل الكويت؟؟

    • الطريقة كالآتي بعد ما ارسلت شركة امازون او ابل او الشركة اللي شريت منها الشي راح ترسله للصندوق في امريكا ، لما توصل السلعة للصندوق ، الشركة اللي فتحت منها الصندوق (ارامكس او MyUS او او ) راح تشحن البضاعة للكويت عبر مندوب عندهم ويوصلونها للعنوان اللي حطيته في موقع شركة الشحن لما فتحت الصندوق ، اتمنى وضحت الفكرة 🙂

  22. أنا ما أقدر أسجل ولا اقدر اشترك لاني انا بـ اختصار مدمن تسووق ماقدر امسك نفسي بـ يوم او يومين أطير نص معاشي علي شيء تافهه
    حاليا صارلي شهرين ماطلبت من الانترنت انجاز لي 😀

  23. تم الاضافه للمفضل
    اشكرك

  24. بارك الله فيك بعد معاناة مع مواضيع كثيرة وجدت موضوعك اسهلها وانفعها ربي يرزقك الجنة

  25. اولا: شكرًا لك على الشرح
    ثانيًا : أنا شفت موضوعك هذا قبل فترة في مدونتك الخاصة، وسألتك كم سؤال لكن الظاهر إنك وقفت من النشر فيها، لأن مامن جديد فيها.
    ثالثًا : أتمنى لو تشرح طريقة فتح حساب في موقع myus لأن بعضنا ما يتقن الإنجلش، وحسب ما عرفت إن هالموقع يجمع الشحنات وأفضل من ارامكس، فأتمنى أن تشرحه؟
    وبس
    شكرًا كثر حبك للمساعدة

  26. أولاً جزاك الله خيرا كفيت ووفيت شرح مبسط وموضوع فوق الممتاز .. وأحلا شيىء انك تفتح المدونة فى الصباح فتجد موضوع كنت تبحث عنه من فترة 😀 … يعطيك الف عافية اخ عبدالله 🙂 🙂

  27. سؤال، كيف استطعت تشتري من موقع ابل، لانهم دائما يرفضون طلبي والسبب انهم ما يشحنون لعنوان ارامكس او ال forwarding companies. ممكن تفيدنا في الخطوات غلشات نشتري من موقع ابل. وشكرا على الشرح الممتاز

    • العفو ، عادي تحط عنوان أرامكس يمكن من المره الاولى يرفض لكن بعد تعيد المحاولة يوافق بإذن الله ، أنا كل أطلب من ابل عن طريق أرامكس ، إذا ما ضبط بعد جرب لا تحط رقم تلفون شركة أرامكس في الـ Shipping Address حط رقمك ، والعنوان Address line 1 حط العنوان كامل فيه

  28. الله يعطيك العافية ، موضوع رائع وشرح سهل ووافي، لكن باقي شي واحد، نبي شرح للأسعار، يعني عطنا مثال لشي تبي تشتريه وسعره واضح في أمازون جم راح يوصل للكويت، طريقة حسبة السلعة والوزن والجمرك.
    في ناس تشحن عن طريق البريد المحلي تعرف عنه شي وشلون الطريقة؟ مضمونة وسريعة؟

    • السعر مثل ما اهو واضح من الموقع نفسه ، اما سعر الشحن حسب الشركة وأسعارها ، تقدر تدش موقع Shopandship.com اذا كان حسابك من ارامكس وتحت تلقى سعر مثلا الكيلو ، تحت وزن سلعتك (موجود في موقع أمازون في وصف السلعة) وتحط من اي بلد إلى أي بلد وراح يعطيك السعر كم

  29. اشكر اخوي عبد الله على الموضوع الاكثر من رائعه
    كنت احتاج الموضوع من زمان ولم اجد الشرح الكافي

    من اشد المعجبين بمدونتك

    في انتظار جديدك يالغالي

  30. رائع جدا لي فترة بسوي مثله وتكاسلت هههه
    مبدع ياعبدالله

  31. ويليام جونز

    بالنسبة للتسجيل بارامكس مطلوب الرمز البريدي شنو ال Zip Code للكويت؟

    ثانيا انا سامع ان MyUS ياخذ من فيزتك رسوم شهرية اذا سجلت فيه سواء شريت او ما شريت شي . صحيح هالكلام؟

    • حدثت الموضوع ، الرمز البريدي للمنطقة تقدر تاخذه من قوقل ، بالنسبة للكويت من هذا الموقع http://kuwait-post.com حط المنطقة ويطلع لك الرمز البريدي ، بالنسبة لـ MyUS شرحتها فوق (حدثت الموضوع) شوف فيه ثلاث حسابات اذا خذيت البريميم فهو اشتراك شهري او سنوي تدفعه سواء شريت ولا لا أما المجاني لا

  32. همبه البتمبه

    شكرا على هالشرح الوافي ..

  33. ألف شكر اخ عبدالله كفيت و وفيت

  34. hi,
    how did you make the TAX free

    i am planing to buy something from there but the tax to NY is 177$

    if you have a way to do it pls. let me know

    all the best
    SUL

    • بالنسبة للضرايب طبعا تختلف حسب وين موجود صندوقك ، انت لما تفتح صندق من أي شركة راح يفتحونه في ولاية فانت وعلى حسب فيه ولايات ما فيها ضرايب ، موقع أمازون يسمح لك بارجاع الضريبة إذا كان هو البائع للسلعة ( Sold by Amazon ) بعد وصول الشحنة لك في دولتك تقدر تراسلهم عبر الايميل [email protected]

  35. وش اسوي بك بس.. بوسة ع راسك ماتكفي .. :))
    تدري ششلون
    اهدي لك اهداف ميسي هالسنه ههه

  36. فالح القحطاني

    السلام عليكم

    ويعطيكم العافيه اخ عبدالله و اخ كويت بنق

    بعرف شنو الفرق بين اراميكس و و ماي يو اس ؟

    من ناحية حساب الاوزان

    و من ناحية ثانيه ماي يو اس تتعامل بالتوصيل مع دي اج ال هل هذا صحيج ؟

    • وعليكم السلام
      ماي يو اس تحسب حسب الوزن والطول والعرض أما ارامكس بالوزن
      ماي يو اس تتعامل بالتوصيل باختيارك تختار يا دي اتش ال او فيدكس

  37. يعطيك العافية على شرح طريقة التسجيل في myus
    وعلى الموضوع كله، وعندي سؤال بسيط وصغير

    شفت هالموقع http://kuwait-post.com/ وما لقيت الرمز البرريدي
    لمنطقتي، وأنا بفتح حساب في موقع myus شنو الحل؟؟

    وجزاك الله خير

  38. السلام عليكم

    والله على راسي يالتويتان ..
    هذا الي ابيه من زمان ..
    بارك الله فيك يا خوي ..

  39. احمد السهلي

    يعطيك العافية اخوي عبدالله بس حبيت اوضح معلومه للاشخاص الى راح يطلبون من مايus او ورلدشيب
    عند وصول الطلب
    راح يخذون منك دينارين رسوم اذا كان فاتورة الشراء اقل من 100دولا وخمس دنانير اذا اقل من 200دولار و 8دنانير اذا الطلب فوق 300 دولار
    وعاد لكم الحسبه يعني بالمختصر البسيط الواحد اذا حصل شغله ويبي يطلبها يتأكد من سعرها اول شيء اذا كان في فرق بسيط
    ياخذها من بلده افضل. لاني كنت متوقع الشغلات هذي بس مع ارمكس واكتشفت انها مع باقي الشركات الأخرى والكل يقول هذي رسوم جمارك

  40. ابو سلمان

    مشكور
    على الموضوع و الله يجزاك كل خير

  41. الف شكر لك اخ عبدالله الحقيقه عندي استفسارات عن وايد اشياء ومشاكل صادفتني فاذا ممكن ايميلك او اي برنامج اقدر اتواصل معاك فيه ؟!!!

  42. يعطيك العافيه اخوي عبدالله

    لكن عندي سؤال !

    انا سجلت وسويت كل شي بالتمام والكمال

    لكن يوم جيت بحط بيانات الفيزا لفت نظري انه مافي خانه اقدر احط فيها الرقم السري اللي بخلف البطاقه

    وجربت طلبت بعدها بيوم دزولي ايميل انه طريقة الدفع خطاً

    وجربت اعادة تجربة طريقة الدفع من جديد

    وانطر ردهم حالياً

  43. شكرًا اخوي علي الكلام

  44. السلام عليكم
    يعطيك العافية أخوي
    بس حبيت أسأل افضل وسيلة للشحن
    فيديكس ؟ dhl ؟ ارامكس ؟
    وشكرا

  45. شكرا جزيلا للاخ عبدالله التويتان على المجهود الكبير والموضوع الرائع لدى استفسار لكن انتظر رجوع الاخ عبدالله الله يجزيه الخير

  46. may allah bless your efforts
    great work

  47. شكرا لك على الشرح الرئع والنصائح القيمة

  48. جزاك الله الجنة أخوي،
    سؤال أتمنى تجاوبني عليه بأسرع وقت الله يبيض وجهك:
    مثلا أبغى أطلب من مواقع تسوق للزبائن مقابل عمولة و بحط عنواني اللي ب أرامكس الامريكي و البريطاني، لما توصل الشحنة لصندوق
    البريد هذا أقدر أحولها على عنوان الزبونة مباشرة ولا بتجي على عنواني أول وبعدين أشحنها لها؟

  49. السلام عليكم مشكور ع لشرح بس لمنطقه شلون أبي اكتبه أنا الأندلس شارع ٤ قسيمه ١٧٦ شقه ٢ وإذا بسوي حساب ارمكس اوmyus. بفلوس ولا بلاش

  50. السﻻم عليكم
    يعطيك العافية ياخوي
    سؤال اذا بطلب جهاز بﻻي سيشن 4 ومع العاب مسموح دخولها بالكويت وﻻ ﻻ وﻻ فيه العاب معينة ممنوعه ﻻني بطلب وتعبت من نصب المحﻻت وارتفاع اسعارهم

  51. السلام عليك, جزاك الله خير, اخوي ممكن توضح لنا شلون اذا بغينا نسجل في myus من ناحية وقت الطلب نختار هالشركه, وشلون نجمع الشحنات فيها, ومعرفه طريقه حساب الشحنه؟ وهل تحتاج اني افتح صندوق في الكويت او لا ؟ وشكرا ع هالموضوع

  52. جعلى فدوه لك

    يعطيك الف عافيه لي اسبوع ادور حد يشرح لي والله شرحك كافي وموفي
    ياريت تجيب لنا مدونه اهم المواقع الرخيصه ومضمونه وفالك التوفيق وجزاك الله الف خير يا رب العالمين

  53. جعلى فدوه لك

    ماعليك امرر اخوي بغبت منك اجابه…
    انا بشتري من مواقع ….وموكاتبين ارامكس يعني عادى اطلب منهم ولا لا قصصدى اكتب البريد ارامكس
    ولاارامكس يفرق
    وفي مواقع كاتبين فيدكس هل فيديكس نفس ارامكس يصير افتح عندهم مثل طريقه ارامكس محتاجه ردك ظروري
    وماانساك من الدعاء يارب توفيقك

  54. طيب هو فيه myus في السعوديه

  55. يعطيك العافيه اخ عبدالله لكن حتى لو انه الموقع مضمون وثقه ما انصح انك تستخدم الفيزا مباشر يستخدم البايبال افضل بحيث لو تأخر السلعه او صار شي لا سمح الله في طرف ثالث الي هو البايبال

  56. فهد العازمي

    السلام عليكم

    اولا احب اشكر صاحب المدونه على هذا الموضوع واللي يعلم الناس شلون يشترون من بره ويخلون التجار عندنا تبور بضاعتهم

    ثانيا حبيت اوضح للأخوه والاخوات ان حتى هذي الطريقه راح تكلفكم اكثر , شلون ؟ راح اقولكم شلون

    مثلا تشتري شي ثقيل او كميه بضاعه مو تلفون او مثلا اكسسوارات , اتكلم عن ماطور كهربا مثلا او كميه من التلفونات

    خلوني اقول ماطور كهربا وهذا اللي حصل معاي , لو تحسب السعر بالكويت تشوف الماطور ب450 دينار و حصلته بره ب350

    الفرق 100 دينار وهذا فرق كبير , طلبته من بره , اللي ارسله لك مثلا كاتب 30 دولار توصيله للعنوان مالك , انت لو امريكي كان اوكي لأنك بتدفع بس 30 دولار

    لكن انت بالكويت واهو راح يدزه لبريدك هناك بأمريكا , لما يرسله وتدفع 10 دنانير مايعادل 30 دولار , تجي شركه التوصيل هذي وتقولك وصل الماطور و وزنه 47 باوند و حساب التوصيل 60 دينار

    لما تقول اوكي , يدزونه لك واجراءات الجمارك هني و توصيل dhl يمكن 30 دينار , صار المجموع الله يسلمكم 450 دينار

    مع نطره اسبوعين على ماوصلك , يعني لو داق سلف و شاريه من الكويت ابرك

    غير وغير البضايع اللي تشتريها وماتطلع قدك او غير عن الصور وانت تدفع للي بايعلك وتدفع لشركه التوصيل وتدفع حق اللي يوصله لك بالكويت
    وفوق هذا اشتراك سنوي تدفع لحسابك

    يعني السالفه كلها قط فلوس

    شرايكم مو كلامي عدل ؟

    لكن في طريقه محد مهتم فيها , كلكم تروحون امريكا وتنسون ان الكويت في عندها وزاره مواصلات و في قسم عندهم بريد
    وعندهم صناديق

    تفتح الصندوق وتدفع له اشتراك سنوي 3 دنانير بس , اذا ما زادوها وصارت 6 دنانير

    من تفتح الصندوق تاخذ العنوان وتروح ايباي وتحط عنوانك فيه الكويتي , وتشتري اللي نفسك فيه

    كل بايع راح تشوف انه كاتب انه يرسل لكل دول العالم , لما تضغط تشوف الدول اللي يدز لها راح تشوف الكويت

    تضغط على الكويت وتضغط ابديت عشان تشوف كم يرسل البضاعه راح تنصدم من السعر

    انا توني شاري اغراض صاحبهم من كوريا الجنوبيه , يوصل للكويت بدولارين بس

    يدزهم للكويت على عنواني الرسمي بوزاره المواصلات ولما اشوف البضاعه وصلت اروح حق البريد مال مشرف اللي فيه صندوقي او تروح بيان او الرميثيه او حولي هذا اذا كنت من محافظه حولي , تفتح صندوق بالمناطق هذي لأن البريد بس عندهم

    المهم اروح لصندوقي اشوف الاغراض فيه و استلمهم والسلام عليكم

    لا وزن ولا توصيل , لا myus يقولون 100 دولار تكلفه الوزن والارسال , ولا dhl يقولون دينارين توصيل و 8 دنانير تخليص بعض الاغراض

    مادفعت الا دولارين و هني اشوف اذا عليهم جمرك للكويت ادفع واذا ماكو اخذ وامشي

    ياجماعه انا ابي لكم الخير , روحوا موقع وزاره المواصلات وشوفوا محافظتكم وين فيها البريد

    اذا من محافظه حولي انت عندك بيان و مشرف والرميثيه و حولي والسالميه , تفتح صندوق بأشتراك سنوي 3 دنانير وخلاص

    بعض الناس يقولون احنا نطلب من امريكا وماتوصل اذا حطينا عنوانا , نعم ماتوصل لأن كل دول العالم في شي اسمه عنوان بريدي , عندك عنوان توصل ماعندك تضيع اغراضك بالمطار او الميناء , اللي مافيها عنوان بريدي تنحذف على طول او ياخذها موظف يستفيد منها , لازم عنوان

    ساعات تطوف اذا كتبت عنوانك لكن لا تلومهم اذا ما وصلتك , افتح بريد مو خسران شي و اخذ العنوان و اطلب عليه واخذ التراك نمبر من المرسل وتابع بضاعتك شوف وين وصلت

    اذا اكتبوا وصلت بريدك دق سلف وروح بريدك اخذها

    والسلام عليكم

    • مشعل محمد

      شكرا جزيلا أخوي فهد ويعطيك العافيه ، أنا اعجبتني طريقتك أكثر من الموضوع ، بس في عندي سؤال صندوف وزارة المواصلات يستقبل تلفزيونات ؟

  57. نايف الصواغ

    سلام عليكم
    يا شباب انا ابطلب من الصين اغراض ابي احسن مكتب بريد يجمع ويغلف الاغراض ويصوره لي ؟؟
    وسوال حق الاخ فهد العازمي او من يعرف بالاجابه ☺️
    كم مدة وصل البضاعه من الصين عبر بريد وزاره الموصلات اللي هو بريد المنطقه اللي ساكن فبه وشكرا 🙂

  58. محمد العنزي

    بارك الله فيكم التويتان وال q8 دائما سباقين وممتعين ومفيدين بالطرح بس ارجو من اخوي التويتان التفريق بين الشحن الدولي والشحن الداخلي للاخوة لان الفايدة ترد على الشاري وممكن توضح طريقة الشركات اللتي تقوم بتوصيل دولي وكيفية معرفة الموقع الدولي او المحلي وطريقة وضع العنوان اذا الشركة توصل دياركت للبيت وشكراا

  59. ابراهبم محمد

    شكراُ الف شكر لهذا الوصف الدقيق . منتظرين تدويناتك الجديدة انشاء الله

  60. اخ عبدالله اني حابه اطلب من موقع فساتين وعندي الفيزاهل تكفي لو يشترط ايميل امريكي ?

  61. السلام عليكم ورحمة الله تعالى وبركاته اخي عبد الله انا عاطف من تونس انا ممتن لك كثيرا علي هذا الشرح الدقيق للتجارة الالكترونية في الواقع انا مولع كثيرا بالتجارة وخاصة من هذا النوع مع الاسف لا املك مستوى تعليمي عالي و هذا ما حال بيني و بين الدراسة في هذا المجال ولم اجد من يساعدني على ذلك غير المولى و ارجو ان تكون انت بداية الطريق انتظر دعمك جزاك الله خيرا

  62. انت احسن احد بالدنيا

  63. السلام عليكم
    يعطييييك العافيه اخوي صج صج استفدت من موضوعك وايد وان شا الله بميزان حسناتك

  64. جزاك الله خير , كان الموضوع صعب صراحة لكني حسيت ببساطته عالعموم شكراً لك عالشرح المفيد والوافي

  65. بالنسبة للعنوان 1 وعنوان 2
    اللي تقول واحد طويل والثاني قصير هذا من وين جبته ؟ يعني هذا هو الحساب الوهمي وكيف أحصل عليه لأن هذا اللي يعيقني وشكراً

  66. ‏​‏​​ •• آلسَـِْ♡̨̐ـِْلامَ علـِْ♡̨̐ـِْيگمَ •• 

    شرح جميل بس بغيت اعرف انا ساعات اطلب من النت فقط يوصلي عبر اراميكس مع انه ماعندي حساب يعني بس احط اسمي وعنواني واحول الفلوس ياليونيون وسترن واهو يرسلها لاحظت عموله ياخذها بالتحويل واراميكس تاخذ عموله ايضا بس بغيت اعرف شلون تنجسب عموله اراميكس متوهقه ناويه اشتري حوالي عشرين كتاب من موقع وحسبلي الموقع السعر واهو ٣٩دك بس خايفه توصيل اراميكس ياخذون عموله مبيره ممكن تشرح طريقه حسب عمولتهم هل هي للوزن ام للايام لان انا ماعندي حساب فيهم،، والطلب الثاني شرايك بفيديكس انا صديقه تمدحهم وايدا ومفكره ابطل حساب فيهم

  67. لو عاوز تشترى اونلاين يبقى مفيش غير viabox و دة لانه بيدى مميزات كتير اوى
    اولا عشان هو ارخص الاسعار و كمان الوحيد اللى بيقبل التعامل مع bitcoins
    ثانيا البضاعة هتاخد يوم عشان تتشحن من تاريخ عمل الاوردر
    وكمان خدمة العملاء بتتفاعل و تحل المشكلة خلال1- 12 ساعة
    ثالت حاجة انت هتلاقى البضاعة ملفوفة بشكل حلو و فى بوكس تحقة بدون اى اسعار زيادة
    هتقدر تتبع البضاعة و تعرف مكانها و دة كله مجانا
    خدمة التأكد من محتويات الطرود مجانا و تصويره
    Viabox مش هيطلب منك تسجيل او اى اسعاى عشان تعمل اوردر

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *